ნაწოლები - მისი სტადიები და მოვლის რეკომენდაციები

ნაწოლები წარმოადგენს კანისა და ღრმა ქსოვილების დაზიანებას, რომელიც ვითარდება ხანგრძლივი ზეწოლის, სისხლის მიმოქცევის დარღვევისა და მოძრაობის შეზღუდვის შედეგად. ისინი განსაკუთრებით ხშირია მწოლიარე პაციენტებში, ხანდაზმულებში და ნევროლოგიური ან მძიმე ქრონიკული დაავადებების მქონე პირებში.

მისი ადრეულ ეტაპზე აღმოჩენა და სწორი მოვლა გადამწყვეტ როლს თამაშობს როგორც გართულებების თავიდან აცილებაში, ისე პაციენტის სიცოცხლის ხარისხის გაუმჯობესებაში.

ნაწოლების მკურნალობა რთული პროცესია და მისი თვითნებურად მართვა, ექიმის კონსულტაციის გარეშე, არ არის მიზანშეწონილი - თუმცა, არსებობს ზოგადი პროტოკოლი, თუ როგორ უნდა ვუმკურნალოთ ნაწოლებს მისი სტადიების მიხედვით.

​I სტადია: კანის სიწითლე

​ამ სტადიაზე კანი ჯერ არ არის დაზიანებული, თუმცა შეინიშნება მუდმივი სიწითლე, რომელიც   დაჭერისას არ იცვლის ფერს. შესაძლოა იყოს მტკივნეული, უფრო თბილი ან ცივი, ვიდრე გარშემო ქსოვილი.

​ამ ეტაპზე მნიშვნელოვანია დავიცვათ კანი შემდგომი დაზიანებისგან:

️პირველი და უმთავრესი წესი: არასოდეს გააკეთოთ მასაჟი და არ დაზილოთ გაწითლებული ადგილი. ეს კიდევ უფრო აზიანებს კანქვეშა სისხლძარღვებს.

• ️დაუყოვნებლივ  მოვხსნათ ზეწოლა.
• ​️დაბანეთ კანი ნაზად (საპნიანი წყლით) და სრულიად გააშრეთ ფრთხილი შეხებით.
• გამოიყენეთ ბარიერული (თუთიის შემცველი) კრემები
• ️გამოიყენეთ ნაწოლების საწინააღმდეგო მატრასი
• ​აღარ დააწვინოთ პაციენტი ამ მხარეზე, სანამ სიწითლე არ გაქრება.

ამ ეტაპზე სწორი მოვლის შემთხვევაში შესაძლებელია ნაწოლის განვითარება სრულად ავიცილოთ თავიდან.

​

II სტადია: ზედაპირული ჭრილობა

​კანის ზედა ფენა (ეპიდერმისი) დარღვეულია. ჩანს წითელი ან ვარდისფერი ღია ჭრილობა. შესაძლოა გამოიყურებოდეს როგორც გამსკდარი ბუშტუკი.

ამ ეტაპზე მნიშვნელოვანია სისუფთავის შენარჩუნება და დაზიანებული არეს დამუშავება:

• ️გასუფთავება ხდება ფიზიოლოგიური ხსნარით (ნატრიუმის ქლორიდი 0.9%).
• ️არ გამოიყენოთ სპირტი ან წყალბადის ზეჟანგი, რადგან ისინი კლავენ ახლადწარმოქმნილ უჯრედებს და ანელებენ შეხორცებას.
• ​️გამოიყენეთ სპეციალური ჰიდროკოლოიდური ნახვევები, რომლებიც იცავენ ჭრილობას ინფექციისგან.
• მუდმივად აკონტროლეთ ანთებისა და ინფექციის ნიშნები.
• თუ ბუშტუკი მთელია, არ გახეთქოთ.
• ️ამ სტადიაზე რეკომენდებულია ექთანის ან ექიმის ჩართულობა.
• რეკომენდებულია ფიზიოთერაპევტის ჩართულობა სისხლის მიმოქცევის გასაუმჯობესებლად.

​III სტადია: ღრმა დაზიანება

მესამე სტადიაზე დაზიანება ვრცელდება კანქვეშა ქსოვილზე. ჭრილობა ღრმაა, ხშირად შეიცავს ნეკროზულ (მკვდარ) ქსოვილს და საჭიროებს კომპლექსურ მიდგომას.

​ ამ ეტაპზე უნდა მოხდეს მკვდარი ქსოვილების მოცილება და ინფექციასთან ბრძოლა.

• ​აქ უკვე აუცილებელია ქირურგის ჩართულობა, რაც მოიცავს ჭრილობის პროფესიულ დამუშავებას, ნეკროზული ქსოვილის მოცილებას საჭიროების შემთხვევაში, სპეციალიზებული საფენების გამოყენებას.
• რეკომენდებულია ფიზიოთერაპევტის ჩართულობა სისხლის მიმოქცევის გასაუმჯობესებლად.
• შემდგომი დამუშავებისთვის გამოიყენება სპეციალური ანტიბაქტერიული მალამოები და ანტისეპტიკები ექიმის დანიშნულებით.
• თვითმკურნალობა ამ ეტაპზე დაუშვებელია.

​IV სტადია: დაზიანება იმდენად ღრმაა, რომ ჩანს კუნთი, მყესი ან ძვალი. მაღალია ოსტეომიელიტის (ძვლის ინფექციის) რისკი.

⚠️  ეს არის ყველაზე მძიმე სტადია, როდესაც დაზიანებულია კუნთი, მყესი ან ძვალი. ინფექციის გავრცელებისა და სეფსისის რისკი ძალიან მაღალია. ამ ეტაპზე პაციენტი საჭიროებს ქირურგიულ ჩარევას და სისტემურ მკურნალობას

რატომ არის პრევენცია ყველაზე ეფექტური გზა?

ნაწოლების მკურნალობა რთული, ხანგრძლივი და ემოციურად დამღლელია როგორც პაციენტისთვის, ისე ოჯახის წევრებისთვის. სწორედ ამიტომ, პრევენცია არის ყველაზე სწორი სტრატეგია, რომელიც მოიცავს:

• ​პაციენტს პოზიციის შეეცვლას ყოველ 2 საათში ერთხელ
• ფიზიოთერაპევტის აქტიურ ჩართულობას
• ️სპეციალური ანტიდეკუბიტური (ნაწოლების საწინააღმდეგო) ლეიბის გამოყენებას
• ​️კანის სისუფთავის დაცვას და ტენიანობის კონტროლს
• ​​️კანის რეგულარულ დათვალიერებას: მნიშვნელოვანია დაზიანების ადრეულ ეტაპზე შემჩნევა, რათა თავიდან ავიცილოთ ღრმა წყლულები, ამიტომ დღეში ორჯერ მაინც ყურადღებით დაათვალიერეთ "რისკის ზონები": კუდუსუნი, ქუსლები, იდაყვები, ზურგი და კეფა.

​

ნაწოლების  ადრეულ ეტაპზე აღმოჩენა და სწორი მოვლა გადამწყვეტ როლს თამაშობს როგორც გართულებების თავიდან აცილებაში, ისე პაციენტის სიცოცხლის ხარისხის გაუმჯობესებაში.

⚠️ თუ შეამჩნევთ ჩირქს, უსიამოვნო სუნს, სიცხეს ან ჭრილობის გარშემო კანის გაწითლებას და გაცხელებას, ეს ინფექციის ნიშანია და სასწრაფოდ მიმართეთ ექიმს.

ჯეო მედი გთავაზობთ მწოლიარე პაციენტისთვის აუცილებელი ინვენტარის მიწოდებას ბინაზე, ასევე ექთნის და ქირურგის ბინაზე გამოძახების სერვისს.

სერვისის დასაჯავშნად ან დამატებითი ინფორმაციის მისაღებად გთხოვთ დაგვიკავშირდეთ ცხელ ხაზზე:  +032 2 111 500